Январь айында Кыргызстанда 1,8 млрд кВт/саат электр энергиясы өндүрүлдү
2026-жылдын январь айында Кыргызстанда электр энергиясын өндүрүү 1 млрд 880,4 млн кВт/саатты түзгөнүн Улуттук статистика комитетинин маалыматтарын талдоонун негизинде белгилүү болду.
Салыштыруу үчүн, 2025-жылдын январь айында өлкөдө 2 млрд 9,4 млн кВт/саат электр энергиясы өндүрүлгөн. Демек, быйылкы көрсөткүч өткөн жылга салыштырмалуу 129 млн кВт/саатка же 6,4%га азайган.
Буга чейин, 2025-жылдын сентябрь айында энергетика министри Таалайбек Ибраев бул кыш Кыргызстан үчүн эң оор кыш болорун билдирген.
Ошол убактан тартып республикада электр энергиясын үнөмдөө чаралары активдүү киргизиле баштаган. 2025-жылдын ноябрь айынын ортосуна карата бийлик төмөнкүдөй чараларды кабыл алган:
— административдик жана мамлекеттик мекемелерде кечки убакта сырткы жарыктандырууну колдонууга тыюу салынган;
— мектептерде саат 18:00дөн кийин электр энергиясын колдонуу чектелген;
— калк үчүн жаңы кубаттуулук чеги киргизилип, ал 3 кВт менен чектелген.
Натыйжада тургундар кир жуугуч машинаны же электр чайнегин иштетүүнүн бирин тандаганга туура келет;
— 2026-жылдын март айынын аягына чейин майнинг-фермалардын ишмердүүлүгүнө тыюу салынган;
— Бишкек мэриясы кафе, ресторан жана түнкү клубдарда электр энергиясын көп керектеген жабдууларды (электр плиталары, жылыткычтар, мештер жана башкалар) саат 22:00дөн кийин өчүрүп коюу талабын киргизген. Кийин бул талап жумшартылган;
— президент электр энергиясын импорттоонун көлөмүн мүмкүн болушунча кыскартууну тапшырган.
