Каракол шаарында энергетика боюнча заманбап окуу борбору курулат
Каракол шаарында энергетика боюнча заманбап адистештирилген окуу борборун жана окуу-машыгуу полигонун куруу пландалып жатат. Борбор Азиядагы мындай форматтагы биринчи объект болорун КРнын Энергетика министрлигинин басма сөз кызматы билдирди.
Маалыматка ылайык, борборду түзүү демилгеси энергетика министри Таалайбек Ибраев тарабынан көтөрүлгөн. Долбоор Россиянын энергетика министри Сергей Цивилев жана Татарстан Республикасынын башчысы Рустам Минниханов менен болгон сүйлөшүүлөрдүн жыйынтыгында иштелип чыккан.
Долбоорду ишке ашыруу боюнча келишимге Казань шаарында Ильшат Фардиев менен Ильгиз Сыдыгалиев тарабынан кол коюлган.
Апрелдин ортосунда Татарстандык адистер Кыргызстанга келип, курулуш жүргүзүлө турган аймактарды — окуу борборун, машыгуу полигонун жана өндүрүш цехин — изилдеп чыгышкан.
Жаңы борбор заманбап жабдууларды жана коргонуу каражаттарын колдонуу менен электр чыңалуусу алдында иштөө боюнча практикалык көндүмдөргө ээ адистерди даярдоого мүмкүндүк берет.
Ошондой эле долбоордун алкагында биргелешкен өндүрүш түзүү пландалууда — анда электр жабдуулары, анын ичинде бөлүштүрүүчү түзүлүштөр, трансформатордук подстанциялар жана электромобилдер үчүн заряддоо станциялары чогултулат.
Долбоор ишке ашса, Кыргызстан энергетиктерди даярдоодо аймактык борборго айланышы мүмкүн. Бул жерде Борбор Азия өлкөлөрүнөн — Казакстан, Тажикстан, Түркмөнстан жана Өзбекстандан келген адистер да билим ала алышат.
