"Акылдуу" эсептегичтер 416 инспекторду алмаштырып, 291 млн сомду үнөмдөдү

Кыргызстандын энергетика тармагында "акылдуу" эсептегичтерди киргизүү жана санариптештирүү чыгымдарды кыскартууга жана ишти оптималдаштырууга мүмкүндүк берди. Бул тууралуу Жогорку Кеңештин тиешелүү комитет жыйынында энергетика министринин биринчи орун басары Өмүрбек Жеңишбеков билдирди.

Анын айтымында, 2023–2025-жылдары жүргүзүлгөн санариптик реформалардын натыйжасында 416 инспектор кыскартылып, 291 млн сом үнөмдөлгөн.

Мындан тышкары, "Мой свет" мобилдик тиркемеси иштелип чыгып, толук колдонууга киргизилген. Анын негизинде кагаз квитанцияларды таратуу токтотулуп, болжол менен 40 тонна кагаз үнөмдөлгөн.

Эске салсак, учурда депутаттар 2025–2026-жылдардагы күз-кыш мезгилине даярдык көрүү жана аны өткөрүүнүн жыйынтыктары боюнча министрлер кабинетинин отчетун угушууда.