"Дастан" заводунун эсептегичтери Кытайдыкынан 2,5 эсе кымбат – Ө.Жеңишбеков
Өткөн жылы Кыргызстанда орнотулган 500 миң "акылдуу" эсептегич Кытайдан 14 млн долларга сатылып алынганын Жогорку Кеңештин комитет жыйынында энергетика министринин биринчи орун басары Өмүрбек Жеңишбеков билдирди.
Талкуу учурунда депутат Улукбек Ормонов ири каражаттар өлкөдөн чыгып кетип жатканын айтып, ата мекендик өндүрүүчүлөр бар же жок экенине кызыкты.
Өмүрбек Жеңишбековдун айтымында, электрондук эсептегичтерди "Дастан" заводунун базасында чыгаруу пландалган. Бирок тараптар баа боюнча макулдашууга келе алышкан эмес. Ата мекендик продукциянын баасы чет элдик аналогдорго салыштырмалуу 2,5 эсеге кымбат болгон.
"Акылдуу" эсептегичтер Дүйнөлүк банк тарабынан берилген кредиттин эсебинен алынган. Бул шартта милдеттүү түрдө тендер өткөрүлүшү керек болгон. "Дастан" заводу 25 млн долларлык сунуш берген, ал эми кытайлык компания 14 млн доллар сунуштап тендерде жеңип чыккан.
Маалыматка ылайык, бир кытайлык эсептегичтин баасы болжол менен 20 долларды түзгөн.
Депутат Улукбек Ормонов мындай жүйөлөргө нааразы болуп, өкмөт ички өндүрүштү колдошу керек эле деп белгиледи. Анын пикиринде, мамлекет мындай ири каражаттардын өлкө ичинде калуусуна шарт түзүшү зарыл.
