Татарстан делегациясы Кыргызстандын энергетикалык объектилеринин иши менен таанышты
19–21-май күндөрү Татарстан Республикасынын алдыңкы энергетикалык компанияларынын өкүлдөрү Кыргызстанга иш сапары менен келишти. Сапар Кыргызстандын улуттук электр тармагы менен Татарстандын Тармактык компаниясы ортосундагы кызматташтык тууралуу келишимдин алкагында уюштурулду.
Иш сапардын негизги максаты — эки тараптуу кызматташтыкты бекемдөө, адистик тажрыйба алмашуу, Кыргызстандын негизги энергетикалык объектилеринин иши менен таанышуу жана Каракол шаарында курула турган заманбап окуу борбору менен окуу-практикалык полигондун аймагын көрүү болду. Аталган борбордо чыңалуу астында иштөө боюнча энергетик адистерди окутуу пландалууда.
Энергетика министрлигинин маалыматына ылайык, Татарстандык делегацияны Кыргызстандын энергетика министри Таалайбек Ибраев жана Кыргызстандын улуттук электр тармагы ишканасынын башкы директору Ильгиз Сыдыгалиев коштоп жүрүштү. Делегациянын курамына Тармактык компания ишканасынын башкы директору Ильшат Фардиев, курулуш боюнча директордун орун басары Азат Мазитов, “Искра – Волга” технопаркынын жетекчиси Нияз Галимуллин жана “ЭнергоРазвитие” башкаруучу компаниясынын башкы директору Раиль Газетдинов кирди.
Иш сапардын алкагында коноктор Чүй жана Ысык-Көл облустарындагы, ошондой эле Бишкек шаарындагы бир катар стратегиялык энергетикалык объектилерди көрүп чыгышты.
Алардын катарында 500 кВ кубаттуулуктагы Кемин көмөк чордонү да бар. Делегация бул объекттин иши менен таанышып, анын Кыргызстандын энергетикалык системасынын туруктуулугун жана ишенимдүүлүгүн камсыздоодогу маанисине өзгөчө көңүл бурду.
Мындан тышкары, коноктор Бишкек шаарындагы Чыгыш РЭСин, Бишкек электр тармактар ишканасынын өндүрүштүк базасын, ошондой эле Мурас көмөк чордонү жана Ала-Арча көмөк чордонү жогорку чыңалуудагы көмөк чордондорун кыдырып, заманбап техникалык жабдуулар жана энергетикалык инфраструктура менен таанышышты.
Тараптар энергетика тармагындагы өнөктөштүктү мындан ары да кеңейтүүгө, жаңы технологияларды киргизүүгө жана адистерди даярдоо багытында биргелешкен иштерди улантууга кызыкдар экенин белгилешти.
