Быйыл Жалал-Абадда 65 миң акылдуу эсептегич орнотуу пландалууда
Жалал-Абад электр тармактар ишканасы тарабынан электр энергиясынын жоготууларын азайтуу жана калкты сапаттуу электр энергиясы менен камсыздоо боюнча иштер жүргүзүлүүдө. Бул тууралуу аталган ишканадан билдиришти.
2025-жылы Сузак жана Базар-Коргон райондорунда, Майлуу-Суу жана Кара-Көл шаарларында 78 миң 500 даана 1-фазалуу, ал эми бардык район электр тармактарында 4 миң 745 даана 3-фазалуу акылдуу эсептегич орнотулду.
Акылдуу эсептегичтер электр энергиясын так эсептөөгө, мыйзамсыз кошулууларды аныктоого, дебитордук карыздарды азайтууга жана жоготууларды төмөндөтүүгө жардам берет.
Мындан тышкары, “КУЭТ” ААКнын “Жоготууларды кыскартуу” боюнча буйругунун негизинде Жалал-Абад электр тармактар ишканасында пилоттук долбоор ишке ашырылып, 10 кВ аба чубалгылары реконструкцияланды. Анын алкагында СИП-2 жана СИП-3 өзүн-өзү көтөрүүчү зымдары тартылды.
Жүргүзүлгөн иштердин натыйжасында бир катар фидерлерде жоготуулар азайды:
- “Чолок-Терек” фидеринде 20,5%дан 15,3%га;
- “Таштемиров” фидеринде 14,8%дан 6,7%га;
- “ГЭС” фидеринде 19,3%дан 12,4%га чейин төмөндөдү.
Бул көрсөткүчтөр акылдуу технологиялардын энергетика тармагындагы натыйжалуулугун көрсөтүп, электр энергиясын туруктуу жана сапаттуу жеткирүүгө шарт түзүүдө.
2026-жылы Сузак районунун Көк-Арт аймагына, Ноокен жана Токтогул райондоруна, ошондой эле Таш-Көмүр шаарына 65 миң даана акылдуу эсептегич орнотуу пландалууда. Иштер 2026-жылдын аягына чейин аяктайт.
Санариптешкен система — так көзөмөлдүн, туруктуу камсыздоонун жана аз жоготуунун негизги кепилдиги.
