Быйыл дыйкандарга 1666 техника лизинг аркылуу берилди
Суу ресурстары, айыл чарба жана кайра иштетүү өнөр жайы министрлиги тарабынан айылдык товар өндүрүүчүлөрдү заманбап айыл чарба техникалары менен камсыздоо жана машина-трактордук паркты жаңылоо багытында системалуу иштер жүргүзүлүүдө. Бул тууралуу аталган министрликтин басма сөз кызматы билдирди.
Маалыматка ылайык, 2011-жылдан тартып министрликтин демилгеси жана Министрлер Кабинетинин колдоосу менен “АБанк” жана “Элдик Банк” аркылуу 7 лизинг долбоору ишке ашырылып келет.
Долбоорлордун алкагында дыйкандарга жана фермерлерге айыл чарба техникалары жана кайра иштетүү жабдуулары 7 жылдык мөөнөткө, жылдык 6 пайыздык үстөк менен жеңилдетилген шартта лизингге берилүүдө.
Бүгүнкү күнгө чейин мамлекеттик колдоонун негизинде жалпы суммасы 33 миллиард сомду түзгөн 11 629 даана техника дыйкандарга өткөрүлүп берилди. Анын ичинде 2026-жылы 4,9 миллиард сомго 1666 даана техника лизинг аркылуу берилген.
