Насыя алуу үчүн электрондук кезек системасы ишке кирди
Суу ресурстары, айыл чарба жана кайра иштетүү өнөр жайы министрлиги АБанк жана Элдик Банк менен биргеликте жеңилдетилген насыяларды алуу үчүн электрондук кезек системасы ишке киргизилгенин жарыялады. Бул тууралуу аталган министрликтин басма сөз кызматы билдирди.
Маалыматка ылайык, 2026-жылдын 1-июнунан тартып өнөктөш банктардын кезекке коюу үчүн арыздарды кол менен кабыл алуу жана каттоо толугу менен токтотулат.
Мындан ары арыздарды каттоо Министрликтин “iDyikan” санариптик платформасы аркылуу аралыктан жүргүзүлөт.
Жаңы санариптик сервис айыл чарба өндүрүүчүлөрүнө төмөнкү мүмкүнчүлүктөрдү берет:
онлайн каттоодон өтүү;
жеңилдетилген каржылоого арыз берүү;
аралыктан кезекке туруу;
арыздын абалын реалдуу убакыт режиминде көзөмөлдөө.
Системаны ишке киргизүү агроөнөр жай комплексин колдоого бөлүнгөн мамлекеттик каражаттарды пайдалануунун ачыктыгын, даректүүлүгүн жана натыйжалуулугун жогорулатууга багытталган.
“iDyikan” платформасы мамлекеттик кызматтарды жана финансылык инструменттерди электрондук форматта бириктирген аграрийлер үчүн бирдиктүү санариптик терезе катары өнүктүрүлүүдө.
Мындан тышкары, келечекте “iDyikan”мобилдик тиркемесин ишке киргизүү пландалууда. Бул кызматтарга жана каржылоого жетишүүнү дагы да ыңгайлуу кылат.
Каттоодон өтүү боюнча кеңири кадамдык нускама төмөндө жайгаштырылган.
