Дыйкандарга 6% үстөк менен насыялар берилүүдө
“Бириккен товар өндүрүүчүлөрдү каржылоо” программасынын негизинде жеңилдетилген насыялар жылдык 6% үстөк менен берилүүдө. Бул тууралуу Президенттин өзгөчө тапшырмалар боюнча атайын өкүлү Бакыт Төрөбаев билдирди.
Маалыматка ылайык, каржылоо мамлекеттик колдоо программасынын алкагында жүргүзүлүп, негизги максаты – майда өндүрүүчүлөрдү бириктирүү, өндүрүш көлөмүн көбөйтүү жана айыл чарба тармагын өнүктүрүү болуп саналат. Программа 2 жылдан бери ишке ашырылып келүүдө.
Программа Министрлер Кабинетинин 2024-жылдын 6-декабрындагы тескемеси менен бекитилген. Каржылоону Айыл Банк жана Элдик Банк жүргүзөт. Насыянын пайыздык чени – жылдык 6%. Насыянын суммасы 50 млн сомго чейин жетет.
Насыя төмөнкү багыттарга берилет:
мал чарбачылыгы;
өсүмдүк өстүрүү;
күнөскана чарбасы;
тамчылатып жана жаадырып сугаруу;
айыл чарба техникасын лизингге алуу;
машина-трактор станцияларын түзүү.
2026-жылы өлкөбүздө “Бириккен товар өндүрүүчүлөрдү каржылоо” программасы айыл чарба кооперативдерин жана биргелешкен өндүрүштөрдү колдоонун негизги механизмдеринин бири катары улантылып, айыл чарба кооперацияларын кеңейтүү, майда өндүрүштү ирилештирүү жана аймактарда жаңы жумуш орундарын түзүү багыттары боюнча иштер жүргүзүлүүдө.
