Кыргызстан Ислам корпорациясынын мүчөсү болушу ыктымал
Баку шаарында өтүп жаткан Ислам өнүктүрүү банкы тобунун жылдык жыйынынын алкагында Финансы министринин орун басары Нурбек Акжолов Инвестицияларды жана экспорттук кредиттерди камсыздандыруу боюнча Ислам корпорациясынын башкы директору доктор Халид Халафалла менен жолугушуу өткөрдү.
Финансы министрлигинин маалыматына ылайык, жолугушуунун жүрүшүндө тараптар Кыргызстандын Инвестицияларды жана экспорттук кредиттерди камсыздандыруу боюнча Ислам корпорациясынын курамына кошулуу маселесин талкуулашты.
Жакынкы аралыкта корпорациянын башкаруучулар кеңешинин жыйыны өтүп, анда Кыргызстандын аталган эл аралык уюмга мүчө болуу боюнча өтүнмөсүн жактыруу маселеси каралары белгиленди.
Жолугушуунун катышуучулары Кыргызстандын корпорацияга кошулуусу инвестицияларды тартуу мүмкүнчүлүктөрүн кеңейтүүгө, өлкөнүн экспорттук потенциалын өнүктүрүүгө жана эл аралык экономикалык кызматташтыкты чыңдоого өбөлгө түзөрүнө ишеним билдиришти.
Мындан тышкары, үстүбүздөгү жылы келечектеги кызматташтыктын алкагындагы өз ара аракеттенүү механизмдерин кеңири талкуулоо жана түшүндүрүү максатында корпорациянын делегациясынын Кыргызстанга сапары күтүлүп жатканы белгиленди.
