Бишкекте 15 жылдан кийин 9 кабаттуу үйгө пайдалануу актысы берилди
Кечээ Курулуш, архитектура жана турак жай-коммуналдык чарба министрлигине караштуу мамлекеттик архитектуралык-курулуш көзөмөл департаментинин директорунун орун басары Руслан Суракматов жана Бишкек шаардык башкармалыгынын башчысы Мирлан Шайымкулов Бишкек шаарындагы Киев көчөсү, 206 дарегинде жайгашкан 9 кабаттуу турак үйгө пайдаланууга берүү актысын тапшырышты.
Бул турак үй 15 жыл мурун "КЭП Строй" ЖЧКсы тарабынан курулган. Имарат эки блоктон туруп, 82 батирди камтыйт. Бирок узак убакыт бою пайдаланууга берүү маселеси чечилбей келген.
Мунун айынан тургундар батирлерине менчик укугун каттай алышпай, керектүү документтерди алууда кыйынчылыктарга дуушар болушкан. Ошондой эле коммуналдык кызматтар үчүн узак убакыт бою жогорулатылган (өнөр жайлык) тарифтер менен төлөп келишкен.
2025-жылдан тарта Курулуш министрлиги өлкө боюнча көйгөйлүү көп кабаттуу турак үйлөрдү мыйзамдаштыруу жана маселелерин чечүү боюнча этап-этабы менен иш жүргүзүп жатат.
