Турак жайларды мыйзамдаштырууда карама-каршылыктар бар – У.Карыбеков
Жогорку Кеңештин жыйынында депутат Улукбек Карыбек уулу жер амнистиясын ишке ашыруудагы көйгөйлөр тууралуу айтты. Анын айтымында, турак жайларды мыйзамдаштыруунун биринчи жана экинчи этаптары аяктаган. Бирок азыркы учурда бир эле турак жай массивинде бир эле адамдарга ар кандай мамиле жасалып жаткан түшүнүксүз жагдай жаралууда.
Ал билдиргендей, буга чейин Аламүдүн районунда 110 үйдү мыйзамдаштырып, алардын ээлерине бардык укуктук документтерди берүү пландалган. Бирок аймак Бишкек шаарынын карамагына өткөндөн кийин шаардык архитектура темир жол линиясы өтөт деген жүйө менен уруксат берүүдөн баш тарта баштаган.
Ошол эле учурда, депутаттын айтымында, коңшу жайгашкан Ак-Бата турак жай массивинде ушундай эле шарттарда башка үй-бүлөлөргө документтер бериле берүүдө.
Улукбек Карыбек уулу дагы бир маселени көтөрдү: 18 үй-бүлөгө алардын объекттери коммерциялык багытта (көп кабаттуу үйлөр, дүкөндөр же цехтер) деп табылып, мыйзамдаштыруудан баш тартылган. Анын айтымында, мындай чечимдер мыйзамдын так нормаларына шилтеме берилбестен кабыл алынууда.
Депутат белгилегендей, амнистиянын негизги максаты — жарандардын жер тилкелеринде курулган турак жайларды мыйзамдаштыруу жана аларга укуктук макам берүү.
Ал кабыл алынган чечимдерди кайра карап чыгып, 110 үй-бүлөгө адилеттүү мамиле жасап, документтерди толук бүтүрүүгө чакырды.
