УКМК Ош мэриясындагы жасалма тендер боюнча маалымат берди

УКМК Ош шаардык мэриясында жасалма тендер өткөрүүгө байланышкан коррупциялык схема аныкталганын билдирди.

Маалыматка ылайык, муниципалдык менчик башкармалыгынын мурдагы жетекчисинин орун басары К.М. В.Терешкова атындагы №11 мектеп-интернатынын жатаканасын бузуу боюнча тендер уюштурган.

Ошол эле учурда, текшерүүнүн жүрүшүндө аталган имарат тендер өткөрүлгөнгө чейин эле толугу менен бузулуп бүткөнү аныкталган.

Мындан тышкары, бузуу иштеринен кийин калган 7 млн сомдон ашык суммадагы курулуш материалдары мыйзамсыз сатылып кеткен. Бул аракеттерди жашыруу үчүн жасалма документтер түзүлгөн. Мамлекетке келтирилген жалпы зыян 7,7 млн сомду түзгөн.

Сот К.М.ны күнөөлүү деп таап, 300 миң сом өлчөмүндө айып пул салган жана келтирилген зыянды өндүрүп берүү милдетин жүктөгөн. Учурда иш Жогорку сот тарабынан каралууда.

Эске салсак, 14-апрелде президент Садыр Жапаров Кара-Кулжа районунун тургундары менен жолугушууда Курсантбек Матиев (К.М) өлкө башчыга кайрылып, жоопкерчиликке адилетсиз тартылганын айтып, ишин көзөмөлгө алууну суранган. Ал мектептин жатаканасын бузуу боюнча Өзгөчө кырдаалдар министрлигинин, Ош мэриясынын чечимдери чыкканын, өзү төрт ай камакта отуруп, бюджетке 1 млн сом төккөнүн айткан.

Садыр Жапаров Курсантбек Матиевдин ишин териштирип, мыйзамсыз иштер аныкталса каражатын кайра кайтарып берүү тапшырмасын берген.