Талас облусунда быйыл 3 энергетикалык объект курулат
Быйыл Талас облусунда үч энергетикалык объектинин курулушу аяктап, пайдаланууга берилгенин Энергетика министрлиги билдирди.
Маалыматта белгиленгендей, учурда темир-бетон буюмдарын чыгаруучу жаңы цехтин котлован казуу иштери аяктады. Андан темир-бетон электр мамылары, ошондой эле суу өткөргүч темир-бетон шакектер сыяктуу буюмдар чыгарылат. Жылына 2 миңден ашуун мамы өндүрүлүп, жергиликтүү өндүрүштү өнүктүрүүгө, чыгымдарды кыскартууга жана жаңы 8 жумуш ордун түзүүгө мүмкүндүк берет.
Мындан тышкары, Абдыкалык Калматов участогундагы административдик имаратынын учурда пайдубалы куюлуп жатат. Имарат бир кабаттуу болуп, жалпы аянты 238 чарчы метрди түзөт жана 8 кызматкерге ылайыкталат. Бул объект 1960-жылы курулган эски имараттын ордуна салынып жатат.
Андан сырткары, Талас электр тармактар ишканасынын аймагында жайгашкан жогорку чыңалуудагы аба линиялары жана Электр жабдууларын сыноо, жогорку чыңалуудан коргоо жергиликтүү кызматы, ашыкча чыңалуудан коргоо кызматы, сыноо кызматтарынын имараты реконструкциядан өткөрүлөт.
Жогоруда аталган иштер Улуттук электр тармактарынын өздүк каражаттарынын эсебинен каржыланып, иштерди Талас электр тармактар ишканасы жүргүзүүдө.
