Кара-Суу районунда 40 млн сомго ветеринардык административдик имарат курулуп баштады
Кара-Суу районуна караштуу Датка айыл аймагынын Медресе айылында райондук ветеринария, мал чарбасын өнүктүрүү, жайыт жана тоют башкармалыгынын жаңы административдик имаратынын курулушу башталды. Ага ылайык салтанаттуу иш-чара өткөрүлүп, мезгил кутусу салынды.
Долбоордун жалпы сметалык баасы 40 087 416 сомду түзүп, имараттын жалпы аянты 420 чарчы метрди камтыйт.
Буга чейин колдонулган имарат 2004-жылы ашар жолу менен курулуп, учурда авариялык абалга келип, пайдаланууга жараксыз болуп калган. Ошондуктан жаңы имарат куруу чечими кабыл алынган.
Жаңы объект Курулуш министрлигине караштуу “Кыргызкурулуш” мамлекеттик ишканасы аркылуу ишке ашырылып, аткаруучу болуп ЖЧК “Арт Хаус” аныкталган. Курулуш иштери 4 ай ичинде аяктоо пландалууда. Объектти пайдаланууга берүү ушул жылдын сентябрь айына белгиленген.
Жаңы имараттын курулушу райондун агрардык секторун өнүктүрүүдө стратегиялык мааниге ээ. Ал ветеринардык кызмат көрсөтүүлөрдүн сапатын жогорулатууга, мал чарбасын натыйжалуу башкарууга, жайыт жана тоют ресурстарын рационалдуу пайдаланууга өбөлгө түзөт.
