ЦУМдун жанындагы фонтандын азыркы акыбалы кандай?
Учурда Бишкекте ЦУМдун жанында фонтан үчүн суунун айлануусун камсыз кыла турган түтүктөрдү орнотуу максатында траншеялар казылганын социалдык тармактарда архитектор Ядгар Мухтар билдирди.
Долбоорду ишке ашырып жаткан компания да курулуштун технологиялык процесси тууралуу маалымат берди. Белгиленгендей, эки түтүк тартылат — бири фонтанга суу берүү үчүн, экинчиси кайра сордуруу (кайтаруу) үчүн. Алар "кум жаздыгы" деп аталган негизге жайгаштырылат.
Комплекстин астында насос станциясы жана жабдуулар жайгашкан техникалык бөлмөлөр болот. Жалпысынан беш насос каралган, анын ичинде авариялык түрдө сууну сордуруп чыгаруу насосу да бар.
Курулуштун качан аяктары азырынча белгисиз.
Мурда борбор калаанын мэри Айбек Джунушалиев ЦУМдун жанындагы курулуштарды бузуп, фонтанды жана жашыл аймакты баштапкы абалына келтирүүнү талап кылган. Себеби салынып жаткан объект бекитилген архитектуралык долбоорго жана шаар куруу нормаларына туура келбей калган.
