ИИМдин өкүлдөрү ДНК далилдери менен иштөөнүн окуусунан өтүштү
Кыргызстандын ИИМнин Эксперттик-криминалистикалык кызматынын кызматкерлери кылмыш болгон жерде ДНК далилдерин аныктоо, алуу жана изилдөө боюнча беш күндүк эл аралык окуудан өтүштү.
Окуу Европа Биримдигинин EU ACT («Уюшкан кылмыштуулукка жана терроризмге каршы аракеттер») долбоорунун колдоосу менен уюштурулуп, ага ИИМдин Эксперттик-криминалистикалык кызматынын, Бишкек шаардык жана Чүй облустук ички иштер башкы башкармалыктарынын кызматкерлери катышты.
ИИМдин басма сөз кызматынын маалыматына ылайык, сабактарды эл аралык эксперттер Португалия полициясынын илимий лабораториясынын кылмыш-криминалистика боюнча эксперт-иликтөөчүсү Бруно Антунеш жана Испаниянын улуттук полициясынын экспертиза илимий борборунун улук инспектору Марина Гамонал Симон өткөрүштү.
Катышуучулар биологиялык издерди табуу, алуу, таңгактоо жана сактоо, ДНК далилдеринин бүтүндүгүн камсыз кылуу, ошондой эле соттук-генетикалык изилдөөлөрдүн негиздери боюнча практикалык көндүмдөрдү өздөштүрүштү.
Катышуучулар биологиялык издерди аныктоо, бекитүү, алуу, таңгактоо жана сактоо боюнча заманбап ыкмаларды, кылмыш болгон жерлерди кароонун өзгөчөлүктөрүн, ДНК далилдеринин сакталышын камсыз кылуу жана далилдер чынжырын сактоо эрежелерин үйрөнүштү. Биологиялык издерди аныктоодо заманбап криминалистикалык технологияларды колдонууга, кан издерин талдоого, ошондой эле соттук-генетикалык изилдөөлөрдү жүргүзүүнүн негиздерине өзгөчө көңүл бурулду.
Өткөрүлгөн иш-чара Ички иштер министрлигинин биринчи генетикалык лабораториясын түзүүнүн алкагында адистерди даярдоонун кезектеги этабы болду. Заманбап ДНК-анализ ыкмаларын киргизүү эксперттик-криминалистикалык изилдөөлөрдүн мүмкүнчүлүктөрүн кеңейтип, чогултулган далилдердин сапатын жана кылмыштын бетин ачуунун ошондой эле тергөөнүн натыйжалуулугун жогорулатат.
