Авиакомпанияларга учакта кыргыз тилинде маалымат берүүгө милдеттендирилди
Жарандык авиация мамлекеттик агенттиги аба кемелеринин бортунда жүргүнчүлөрдү маалымдоодо мамлекеттик тилди колдонуу боюнча жаңы милдеттүү талап киргизди. Бул тууралуу "Манас" эл аралык аэропортунан билдиришти
Маалыматка ылайык, эми Кыргызстанга, Кыргызстандан жана өлкө ичинде аткарылган бардык каттамдарда жүргүнчүлөр үчүн негизги маалыматтар кыргыз тилинде да жарыяланышы керек. Бул талап Кыргызстанга эл аралык каттамдарды аткарган бардык чет өлкөлүк авиакомпанияларга дагы тиешелүү.
Буга чейин эл аралык каттамдарда маалымат негизинен англис, орус жана каттам аткарылган мамлекеттин тилинде берилсе, эми алардын катарына мамлекеттик тил да милдеттүү түрдө кошулат.
Жаңы талаптын максаты – мамлекеттик тилдин макамын чыңдоо, жүргүнчүлөрдүн маанилүү маалыматты тең укукта алуусун камсыз кылуу жана жарандык авиациядагы тейлөө сапатын жогорулатуу.
Мындан ары авариялык коопсуздук боюнча нускамалар, учуу жана конуу тууралуу кулактандыруулар, учуу коопсуздугунун эрежелери жана башка милдеттүү билдирүүлөр кыргыз тилинде да айтылышы шарт. Ошондой эле мамлекеттик тилдеги маалымат башка тилдерде берилген маалымат менен толук жана мазмуну жагынан бирдей болушу талап кылынат.
Жарандык авиация мамлекеттик агенттиги бардык авиаташуучу компаниялардын жетекчилерине кыргыз тилиндеги расмий кулактандыруулардын тексттерин даярдап, жаңы талаптын бардык каттамдарда аткарылышын камсыз кылууну тапшырды.
