Ош–Ноокат жолундагы сапатсыз тилкени үч күндүн ичинде оңдоо тапшырмасы берилди
Социалдык тармактарда тараган видеодон кийин Ош–Ноокат унаа жолунун сапаты жеринде текшерилип, талаптарга жооп бербеген жол тилкесин үч күндүн ичинде кайра жасоо боюнча көрсөтмө берилди. Бул тууралуу Курулуш, архитектура жана турак жай-коммуналдык чарба министрлигинен билдиришти.
Мамлекеттик архитектура-курулуш контролдоо департаментинин жана Курулушта сертификаттоонун республикалык борборунун Түштүк аймактык башкармалыгынын адистери көчмө лаборатория менен Ош–Ноокат унаа жолунда текшерүү жүргүзүштү.
Министрликтин маалыматына ылайык, текшерүү социалдык тармактарда жолдун сапатына байланыштуу жарыяланган видеоматериалдын негизинде уюштурулган.
Текшерүүнүн жүрүшүндө Ош шаары аркылуу өткөн Мамыров көчөсүнүн 3–4-чакырымындагы жол тилкесинде бир катар кемчиликтер аныкталды. Асфальт-бетон жабындысынын сапаты текшерилип, лабораториялык изилдөө жүргүзүү үчүн керн үлгүлөрү алынды.
Жыйынтыгында башкы подрядчы "Кыргызавтожол" мамлекеттик ишканасынын №21 Жол тейлөө башкармалыгына (ДЭУ-21) карата акт түзүлүп, талаптарга жооп бербеген жол тилкесин кайра жасоо боюнча көрсөтмө берилди. Подрядчы уюмга аныкталган кемчиликтерди жоюу үчүн үч күндүк мөөнөт белгиленди.
