Ысык-Көлдө жол курулуштарын тездетүү тапшырмасы берилди
Транспорт жана коммуникациялар министринин биринчи орун басары Тариэль Жаныбеков Ысык-Көл облусунда ишке ашырылып жаткан жол куруу жана реконструкциялоо долбоорлорунун жүрүшүн жеринен текшерип, курулуштун сапаты жана мөөнөттөрүнүн сакталышы боюнча бир катар тапшырмаларды берди.
Ведомствонун маалыматына ылайык, иш сапардын алкагында бир катар маанилүү жол объектилериндеги курулуш иштеринин жүрүшү каралды.
Алардын катарына "Каракол – Эңилчек" автожолунун 0–38-чакырым аралыгын, "Ак-Булуң – Токтогул" жолунун 0–8-чакырым аралыгын жана "Каракол – Раздольный – Советский – Сыртзавод" автожолунун 38,5–51-чакырым аралыгын реконструкциялоо долбоорлору кирет.
Мындан тышкары, "Бозучук – Жыргалаң айылы" автожолунун 14,5 чакырым тилкесине асфальт-бетон төшөө жана "Жыргалаң" тоо-лыжа курортуна алып баруучу 8,5 чакырым автомобиль жолун жана технологиялык кирме жолдорду куруу долбоорунун жүрүшү текшерилди.
Текшерүүнүн жыйынтыгында Тариэль Жаныбеков тиешелүү түзүмдүк бөлүмдөргө, инженер-консультанттарга жана подряддык уюмдарга курулуш иштеринин темпин күчөтүү, бекитилген графиктен четтебөө, аткарылып жаткан иштердин сапатын күчөтүлгөн көзөмөлгө алуу жана бардык объектилерди белгиленген мөөнөттө пайдаланууга берүү боюнча конкреттүү тапшырмаларды берди.
