Бишкекте 4,1 чакырымдык көчө толугу менен реконструкцияланат
Бишкек шаарынын мэри Айбек Джунушалиев Элебесов, Безымянная жана Кожевенная көчөлөрүндө жүрүп жаткан реконструкция иштеринин жүрүшү менен таанышты.
Мэриянын маалыматына ылайык, Элебесов көчөсүндө шаар башчысы жергиликтүү тургундар менен жолугушуп, канализация куруу маселесин талкуулады. Жыйынтыгында "Бишкексууканал" муниципалдык ишканасына үч күндүн ичинде канализация тармактарын тартуу мүмкүнчүлүгүн изилдеп, расмий жооп берүү тапшырылды.
Кожевенная көчөсүндө реконструкция аймагына кирген тосмолорду, анын ичинде ӨКМдин №2 өрт өчүрүү-куткаруу бөлүгүнүн тосмосун алуу тапшырмасы берилди.
Андан соң мэр Кыргыз көчөсүнүн Саадаев көчөсүнөн Түндүк айланма жолуна чейинки 4,1 чакырымдык тилкесиндеги курулуш иштерин көрүп чыкты.
Долбоорго ылайык, бул тилкеде жол төрт тилкелүү болуп кеңейтилет. Ошондой эле эки тротуар, ирригациялык система курулуп, учурдагы көпүрө кеңейтилет.
Айбек Джунушалиевдин айтымында, алгач жолду гана реконструкциялоо пландалган. Бирок тургундардын кайрылууларынан кийин биринчи кезекте канализация тармактарын куруу чечими кабыл алынган.
"Адегенде жолду куруп алып, бир нече жылдан кийин кайра канализация өткөрүү үчүн аны бузуу туура эмес", — деди шаар башчысы.
Маалыматка ылайык, жаңы канализация тармагы пайдаланууга берилгенден кийин болжол менен 2 миңге жакын тургун борборлоштурулган канализация кызматы менен камсыз болот.
